АГТИС, во соработка со ОТВ, започнува со реализација на проект под наслов „Дигитална архива и туристичка промоција на културното наследство на Прилеп“.
Проектот е насочен кон систематско снимање, документирање и дигитално зачувување на културните настани и културно-историските вредности на Прилеп и прилепскиот регион. Преку современ медиумски пристап ќе се овозможи долгорочна дигитална архива на културниот живот во градот, како и негова поатрактивна презентација пред пошироката јавност.
Во рамки на активностите ќе бидат опфатени културни манифестации, настапи на млади уметници и локални групи, како и изработка на документарни емисии посветени на најзначајните туристички и културни локации. На овој начин се создава современа платформа за промоција на Прилеп како значајна културна и туристичка дестинација.
Проектот има за цел да придонесе кон поголема видливост на локалната културна сцена, зголемување на интересот кај младите, како и подготовка на квалитетни медиумски материјали кои во иднина ќе можат да се користат за стратешки промоции и апликации кон меѓународни фондови и програми.
Со ова се воспоставува основа за долгорочна дигитална презентација на културното наследство на Прилеп, со што градот добива дополнителна вредност во областа на културата, туризмот и локалниот развој.
Проектот е поддржан од Општина Прилеп, локални културни институции и домашни донатори.